لجل عين المهاه ..!

اصّ نرجوا مْن الحضور الإنتباه.
المعاني ودها بقلب ٍ نبيه.

ماتبي رجل ٍ فتح عينه وفاه.
ولاتبي عقل ٍ سرح بين الوجيه.

نجمة ٍ خايلتها بْعين الغناه.
وخايلتني بْعين منفي من ذويه.

القناعه كنز ....! خيره بالنجاه.
ونفس إبن آدم على الشر تحديه.

حلق القرناس من فوق القطاه.
هيبته ترسم شموخ ٍ مكتسيه.

لا يقايضني لجل عين المهاه.
يبطي...! وتبطي هنوف ٍ له تجيه.

لاتحرّى القلب يرسل لك زكاه.
شوف حرفك ثم عايد لي عليه.

علموا الجاهل في صومه والصلاه.
خير له من شي في راسه يبيه.

يقدح المعنى..! ويشعم في فضاه.
والخطآ بْعين الملآ ... دايم وجيه.

مارضيت الذل .. دام انّه رضاه.
ولا بقى بالناس ..! خير ٍ نرتجيه.

دنيتي لو ماملكت إلا حصاه.
خير من مِنّة غني ..! وإلا سفيه.

لو يقول إنه ملا..! ذيك القناه.
الصراحه...! ما ملاها بالنزيه.

والغيوم ..! اللي زبرها في سماه.
لو عصرها وقت جفت في يديه.

والعمى يمناه لو تفلت عصاه.
رحلته .... فيها خطوره تحتريه.