سنين الضياع - محمد العضياني

بين عقد اجتماع وبين فض اجتماع
للزمن كلمةً تصدق ليا قالها

ان حكم بالوصل والا حكم بالوداع
عم هذي وهذي يعتبر خالها

ما حسب للجدايل والعيون والوساع
يخطف احلام راعيها ويغتالها

لو تباكت على بابه سنين الضياع
ما رجع من حنانه يستر احوالها

مالها الا الرحيل اللي بليا متاع
تترك الخزنة ام اقفال باقفالها

وان تكوّن لديها عنه سوء انطباع
تعرف انه يسوق العير باحمالها

ما معه للكريم ولا معه للشجاع
حيلةً لا تضايق منه يحتالها

لا تعاتب على سيره جميع البقاع
كل دعوى تنزلها بمنزالها

الرحا مستديرة والوفاء المستطاع
سيق فدوة وجيه الناس وازوالها

والضمير النقي ما هو محامي دفاع
كلما جاء قضية جاك مشتالها

مد فالمد مد وصاع فالصاع صاع
والعرب ما سعى في بخس مكيالها

من يذمه عشان الزبد فالصيف ماع
يسمع الجابه اللي جاري ارسالها

لو تغيب الجسارة من قلوب السباع
قيدتها الليال السود بأغلالها

© 2024 - موقع الشعر