سطح القمر

العام في صدر الأمة جرح واحد ونتصبّر علاه
واليوم يا فزعة الرحمن من يقدر يعد الجروح

جرحً نحصّل دواه وجرح لا يمكن نحصّل دواه
يسري مع الجسم شره ويتمكن لين يصبح ذبوح

يا سالف الوقت يا ماضيه قل لي حاضره وش بلاه
عيّا يسجل بطولة واحدة تذكر وعيّا يروح

انته تبسم وترسم للنصر صورة بكل اتجاه
والكتب صفحاتها كانت ولا زالت بطيبك تفوح

نحياك داخل حياة وفيك معنى معتبرللحياه
فالقادسية وفاليرموك والا يوم فتح الفتوح

نسحب من حسابك الباقي وندفع لليالي زكاه
لعلها ما تلوم الحاضر اللي من خلوّه ينوح

يمكن بعد قرن والا اكثر يقوم ويختلف مستواه
ويرد الانفاس في مليار والا فوق مليار روح

ياقف على عظم ساقه ويتعين نجدته من يداه
حتى يشيد على جرد الصحاري من رصيده صروح

فيه الهقاوي ولكن الهقاوي ما تهز الصفاه
ان ما تلتها محاريف الشقردي والضمير النصوح

الآخرة صح محتاجة من المسلم صيام وصلاه
لكن دنياه ما ينطح مواجبها قصير الشبوح

القوم عدت على سطح القمر واستنشقت من هواه
والشاوي اللي تردت همته من حول ديس المسوح

وان قلت قالوا موصى والموصى ما يباله وصاه
لكن ريّح ضميرك من عناه وخل قلبك سموح