لاتحبس الدمعه

كان الدموع مضايقة عينك طلبتك هلها
لا تحبس الدمعة وعينك تشتكي من حرها

خل الليالي تصطفق ودموع عينك خلها
تغسل هموم القلب لين يقول لله درها

ماتدري اني يوم جيتك بالنظر فاطن لها
وانته تضحك ناوي ٍ في وسط عينك صرها

وأليا سألت أشلون كل الناس مابين لها
كل الأوادم مادروا عن دمعتي وش سرها

يومنها في وسط عيني حالقه ماملها
ما حد ٍ لحظ غيرك وميز حلوها عن مرها

بجاوبك وأقول لو أجهل ربوعي كلها
ما أجهل حبيب ٍ عاش معيه خيرها مع شرها

حافظك يالغالي مثل ماللقوم حفظت دلها
وأعرف خفايا خاطرك قبل اللسان يثرها

في ذمتي ما قلتها صدفه وجت في حلها
ولا جبتها من سوق راعين الحكي مجترها

لا والله الا أحساس قلبي يالساني قلها
هذا هو أحساس العشيق اللي هوى في بحرها

وكان الدموع مضايقة عينك طلبتك هلها
لا تحبس الدمعة وعينك تشتكي من حرها