متلوعة الجيد

طلت عليه بليل ٍ غابت نجومه
وصارت سمايه بنور الزين وهاجه

طلت عليه وودع قلبي همومه
من عقب ما كان بلشان ٍ بمخراجه

متلوعة الجيد بين البيض معدومه
من شافها قبل سنه يضحك حجاجه

اعن الزلل والدروب العوج محشومه
منهاجها غير من هو عكس منهاجه

طبوعها زاهيه ماهي بمهدومه
والزين ياللي تعرفونه خذت تاجه

سامرتها لين صبحي بان مرسومه
ولين الفرح من سجن حزني خذا افراجه

وكحلت عين ٍ من الأفراح محرومه
وداويت قلب ٍ تعبت أدور علاجه

اللي رماني هواها بأخطر سهومه
وتمكنت في حشاي من أول امواجه

مغروم فيها وهي بالمثل مغرومه
ولالي بطرد الهوا فأمثالها حاجه

الحب ما بيننا ما ضعفت عزومه
ولا همنا في زمنا هرج هراجه

وبإذن الولي ما طمعنا به نبا نرومه
لو كان وسط السماء ما طاحت ابراجه