ابحث عن الجيّد

ابحث عَنِ الجيّد مِنَ الشي لو قَلْ
وابْعد عنِ المضروب في كل حاجه

واحذر سقيم الفكر لاتجعله خِل
قربه مرض مانته محصّل علاجه

وابعد عن اهل الحسْد والحقْد والغل
واحدهم لكسرك يزيد ابتهاجه

واللي شجرْتِه ماتحت غصنها ظل
لاتحتزم به في نهار المواجه

واللي تعنّا يمّك افرش له الزل
واقبل عليه بوجه يضحك حجاجه

واحذر تشنّع في رفيقك ليا زل
وحاول تعدل ميلته وانعواجه

واذا خسرت البعض لاتخسر الكل
لاصار كلٍّ قام يتبع خراجه

واذا وردت الجمه الصافيه عل
تغنيك عن بحرٍ تلاطم هماجه

ولاتلتفت بعيونك لماضيٍ زل
وحاضرك لاتطفي بحزنك سراجه

وارقا سما عن موطن الضعف والذل
والخوف حطم لجل حلمك سياجه

وليا بليت بحاجةٍ مالها حل
أخلص بدعواتك لربك وناجه

وان ضاق صدرك من ظروف الدهر صل
تلقى بها للضيق باب انفراجه