حلم السنين - محمد دخيل القثامي

المشاعر يوم هزّت بالغلا وجداني
مابقا بالصدر غيمٍ مانْهمر لي وبله

الأماني تحتويني والأمل سرّاني
والصبر روحي عليه مْع الزمن منجبله

ابتسم للوقت لو كثرت عليّ احزاني
والفرح من غاب نجمه كل ليل ارقب له

واحسب حساب المواقف واعرف انّ لساني
كلمةٍ تحسب عليه وكلمةٍ تحسب له

وان سرجت مْع الخيول الصافنات حصاني
ماسرجت الاّ الأصيلٍ اللي ملكت اصطبله

وان تحدّيت الظروف وشفتها تَحْداني
ماقِصَرْت عْن الوفا اللي في يديني حبله

وانت ياحلم السنين ويابعد خلاني
ياحبيبٍ كل كلمه صادقه تكتب له

اقطف وْرود المحبه كلها من داني
واعزف مْن حروفي اللي خافقك يطرب له

ولا تشاورني بطلّة حسنك الربّاااني
والله انّك كل يوم احلى من اللي قبله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر