السنين

هذي الليالي نجمها صابة أفول
وهذا الزمن ما هو زمنك و زماني

ياحلمي اللي كل مافيك مقتول
مات الرجا ياحلم والعمر فاني

وماهو طرب يوم أزهم الصبر وأقول
يا رحمة الله يازمانٍ وطاني

متحطمٍ قلب العنا حيل معلول
ماتت على بابه حلوم وأماني

والعقل من كثر التفاكير مذهول
خوفي من الله لا يصيبه جناني

مشلول كف الصبر والعزم مشلول
والدرب موحش والخطاوي تعاني

سيف الغدر في وجه الأيام مسلول
والصدق ماله في زمنا مكاني

والأجودي اللي عاش عمره على طول
متنعمٍ بين السخى والتفاني

ذابت سنينه صابها جدب وذبول
وأصبح( .... )في نظرهم أناني

مابل أرضه غيث مزنِ ولا سيول
ولامر سمعه أمنيات وتهاني

ياسيدي لا تحرث الحزن ويطول
همٍ أضمه بين حدب المحاني

وخل السنين تمرني عجل وحمول
معها شبابي وذكريات و أماني