الأطلال

وين البشر مابه بشر غير الأطلال
اللي عليها دمع عيني ذريفه

دنيا تلاعبنا من الجال للجال
والموت صار بمحجر العين طيفه

يا دمعة المضيوم يا ضيقة البال
يا قلب ٍ يعايش هموم ٍ كليفه

في ذا المكان العام ممسى ومقيال
لأهل الوفاء وأهل القلوب النظيفه

في ذا المكان العام دله وفنجال
وسوالف ٍ بين الحبايب طريفه

واليوم كل ٍ عن مرابيه رحال
شدوا وفارق كل ولف ٍ وليفه

شدوا قبل ما يطلع هلال شوال
وصار المكان بدونهم منه خيفه

شهب الهبايب في مثانيه تختال
والذيب تال الليل تسمع هريفه

سبحان من هو بدل الحال بأحوال
وأصبح ربيع الوقت يشبه خريفه

ضاع الهدف من بعد ضاع ٍ الأمال
ونظراتنا للحلم صارت كسيفه

ويافرحة الحاسد ويا شمت عذال
طاب المسى لأهل النفوس الضعيفه