أن قلت أحبك

أن قلت أحبك صوّت الجدي لسهيل
بصوتٍ صداه يضج ليلٍ سرابه

يابو العيون الناعسات المضاليل
والله ما غيرك لفتني ركابه

مرّت ركاب وروّحت تالي الليل
والصبح يزمي دونهم لي سرابه

لا يابعدهم يابعد كل هالجيل
فالقلب مسكانك بعالي هضابه

لا يا بعد من يلّبسن الخلاخيل
والله غيرك فالزمن ما التوابه

أقلط وقدّامك دلال وفناجيل
عدّل مزاجك لين اجيب الربابه

بجيب لك قافٍ مع الناس ما قيل
يوم القصايد في زمنّا تشابه

يغريه رمشٍ ناعسٍ فاترٍ حيل
وجديلٍ اسود مدلهمٍ سحابه

وعنقٍ تكاشف فيه ما يجعل السيل
ياخذ مداريجه ابمجدب ترابه

والمنطق اللي فيه عذب المراسيل
يقطع ضمايه سلسبيلٍ شرابه

أدري على غيري بعيد المناويل
فيك الشموخ وفيك شوق وصبابه

في سكّتك تتعب جمال وجماميل
ناعم ولكن فيك عز ومهابه

طاولت قافي فيك للجدي وسهيل
حتى تفاخر فيك حضرة جنابه