يا الله اني طلبتك يارحوم ٍ غفور - جهز بن مسيمير المرشدي

يا الله اني طلبتك يارحوم ٍ غفور
تغفرالذنب عن منهو عليك اعتماده

عبدك اللي سجدلك تحت عرشك شكور
يعبد ك وانته اللي تستحق العباده

يطلبك ترحمه يوم البعث والنشور
ترحمه يوم كل ٍ يحتسب للافاده

يوم كلش مسجل فا السنه والشهور
ماخسر من على مطلب ارضاك اجتهاده

وبعد ذكرك وشكرك صارللشعردور
شاعر ٍقال شعره من قريحة افواده

قال شعر ٍ منقا مثل طلع الزهور
مثل نبت الخزامى والنفل فالحماده

مايبا الشاعرالناقد يحصل عقور
ينظم ابيات شعره مثل نظم القلاده

الذهب ندري انه سلعة ٍ ماتبور
يكسب اللي يبيع ومن شراه استفاده

مرحبا با الضيوف وكل زايريزور
عد ماهب ذعذاع النسيم اببراده

عبري يا شعور وغردي ياطيور
با لفخروالموده والفرح والسعاده

نحمد الله تبين كل ماب الصدور
كل زراع زرع ٍ قام يجنا حصاده

خلو العود الازرق لا النشامى يدور
وقبله البن الاشقر زودو في قناده

حفلنا نحمد الله زاد با النورنور
كل مازاد نوره قلت يبغا زياده

زاد نوره بربع ٍ ما لحقهم اقصور
كل واحد بفعله في يمينه شهاده

ربعي الاد مرشد من ذخايراصقور
عزوتي يوم كل ٍ قام يقدح ازناده

رجلنا فيه ثقل وفيه دم ٍ يفور
نوب فينا جنون ونوب فينا ركاده

شلفنا ما توقع غيروسط النحور
ضربها في عقيد القوم واللاجواده

فا الزمان القديم اللي رحاته تدور
من سلم من صباحه ماسلم من هجاده

ربعي اللي لياجات اللوازم احضور
نارهم يوم تالع ما تعودرماده

نشكرالحاضرين ومن يغيب معذور
يمنع الضرف رجل ٍ مايحصل مراده

والمواقف تبين كل رجل ٍ غيور
والردي في رقاده ماصحا من ارقاده

ياخذ الحق وافي كل رجل ٍ صبور
والمعاند يعاند مايفيده اعناده

ما يفيد التغطرس والريا والغرور
كود ذنب ٍ عظيم وضعف عقل ونقاده

والتواضع يخل الرجل دايم فخور
والمكا نه لاهلها والفخر والرياده

علمتنا التجارب من قديم العصور
يستفيد الفهيم ولا تفيد البلاده

التكاتف معزه والتفرق دبور
خلو الراي واحد لايصيرانفراده

وانتوكل على الله في جميع الامور
وكل شيا ً على الله حلته وانعقاده

من تسمع بنمات الكذوب الفجور
صارعقله ومخه مثل مخ الجراده

خالف الراي عن ربعه وصار معثور
مثل من يلطم عيونه بشوك الكداده

مايعرف الورود ولايعرف الصدور
ضاع في ليل ٍ اسود مظلم ٍ به سواده

والختام اسمحولي ياطوال الشبور
اسمحولي ترى معناي واضح قصاده

يا الله انك تكافينا جميع الشرور
ياعظيم ٍ رزق خلقه ومحصي اعباده

© 2024 - موقع الشعر