ياليت قلبي يستمع في عذوله
اظن صدري ينشرح يوم ضاقي
من ضيقتاً ماتنتهي بالسهوله
صارت عليه مثل حرب العراقي
خذتلها فا القلب صوله وجوله
ما عاد باقيلي من الصبر باقي
من وقتنا اللي صار لبن الحموله
لوطابله ضيق عليه الخناقي
يشوف من عقب ارتفا عه نزوله
من الوقت شاف الراس فيه الفلاقي
واللاش يومن اليدين معقوله
سيطر على الاجواد واحرق احراقي
مغرور في شكله بعرضه وطوله
ويقول انا من طيبين العماقي
ثورن من النعمه هذا كبر زوله
وقتاً مضى يضفا عليه الرواقي
وابوه لا ش وجده اطيب افعوله
عند الغنم راعي وعند النياقي
ساسه ردي ما فيه عزاً ينوله
وغير الردا يابجاد سلكه ادقاقي
ليا من جاله شلتن صفقوله
اعلنت عن كل الجميع الفراقي
الرجل يعرف مخرجه من دخوله
والعز غايت مقصدي واشتياقي
اللاش تحرم رفقته مع قبوله
ابتركه لو هو على كسر ساقي
رجلاً يقول ولا يجي عند قوله
ودك على راسه تحط العراقي
ما عاد به رفقه ولابه رجوله
غير النذاله والحسد والنفاقي
اهل القلوب البيض واهل البطوله
يا رب ترحمهم نهار التلاقي
اخرهم اللي راح ما دار حوله
وحنا وراهم مثل مشي الطراقي
يالعبدلا تطيع نفسً جهوله
ترا الزمن يعطيك مر المذاقي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين