يا ولد منصور لو جوي صفالي . - محمد البياضي

ادري ان في خاطرك ليه سؤالي
وادري انك تخجل توجه ليه

فيك شيمه تمنعك وتقول خالي
وفيك تقدير وادب زايد شويه

السؤال يقول فاقد من خوالي
خال دايم فاالنظر صبح ومسيه

له بقلبي موقع ومنزال عالي
ما نزله انسان قبله قيد نيه

غير ابوي الوالد الاب المثالي
وهو ابي والخال والد واب زيه

ياالبناخي قبل ما ابدأ في مقالي
وقبل اجاوب لسئلتك الداخليه

لك فرحت وفرحتي طول الليالي
ثابته فاالقلب دام الروح حيه

وعد ما البراق في عرض الخيالي
لاوح وهل المطر قبل ابرديه

وعد ما هبت ذعاذيع الشمالي
وما تهب من الرياح الموسميه

ياعسى مبروك صورها خيالي
شعرنظم وباالحروف الابجديه

ماهو بتعبير او هاجس طرالي
ذي احاسيس وشعورٍ واقعيه

لك واخص الوالدين وكل غالي
واالعمام وكل من يشره عليه

لك يا مشعل وانت اعدك من عيالي
واحدٍ منهم مكانتكم سويه

من بعدها ياالبناخي ما جرالي
وما دعاني مآصلك ذيك العشيه

ليلةٍ فيها الفرح يشعل شعالي
وجوها جر اللحون السامريه

وانت كم فيها تمنيت الرجالي
الرجال اهل الوفاء واهل الحميه

يآصلو ويشاركو من كل جالي
فرحتك بقلوب صافيةٍ نقيه

اعرف انك رجل لاحل المجالي
ولك غلاء عند الرجال الصيرميه

فيك طيب وفيك عز وما تبالي
وفيك نخوه لاانتخى الخوي بخويه

كيف ما يآتوك ماضين الفعالي
الرجال الليّ تشد المعنويه

غير ربعٍ لك بعيدين المدالي
العنوز الليّ لهم روحه وجيه

كنت تتمنى ولو تآقف قبالي
لا وصلتك تفخر وتعتز فيه

يا ولد منصور لو جوي صفالي
كان جيتك لكن ظروفي قويه

اشغلتني عنك لما ضاق بالي
واالحقتني كيةٍ من فوق كيه

العذر للوالدين وكل غالي
ولك ولعمامك ومن يشره عليه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر