ريقه همـــاج

أرتفع طوفان شعري بالضلوع
واصطفق ما بين حالك والسياج

زام جوفي من طلوع ٍ في طلوع
يدحم الظلمه وطاري الود راج

قوّس ضلوعي وانا رجل ٍ جزوع
ثم طغى .... حتى لغى كل إبتهاج

اسرج الإعجاب جاني به طيوع
وحل في قلبي وداج القلب داج

ثم سرج ركب الغياب اللي يصوع
قلبي الوافي له الحزن النتاج

صد قلبه لابس ٍ ثوب القطوع
وانطوى عشرين ليل بْلا سراج

كل ماضي له مع الذكرى رجوع
يا ربيع ٍ في تفاصيله عجاج

لو عيون المزن تذرف للجموع
ما غسل قلب الخطا دمع ٍ اجاج

ولو يذوب إلها الحلا والاّ يجوع
قلت دوبك يالحلا ريقه هماج

ولو تشب العين وتسيل الدموع
قبلها ذابت شموع الاحتياج

ما يعيد الوصل تغيير الطبوع
ومايطيب الجرح والهجر العلاج