على .... الجال - تذكار الخثلان

كلش بعيني تافهٍ قمت اشوفه
ياصغرها الدنيا على ضايق البال

لو تمتلك كل المزايا كفوفه
تبقى حياته كلها اهمال ف اهمال

ماعاد باقي في حياتي حسوفه
وش عاد عندي باقي فيه مازال

ان قلت ما بي زاد بالقلب خوفه
وان قلت ابسكت ينجرح واقع الحال

كني بدنيا شمسها في كسوفه
والليل ظلما والشقا فيه يختال

واللي خفا يصعب عليّه وصوفه
متاعبٍ منها انقلب حالي احوال

ان جاد يوم عاندتني ظروفه
كني اعيش ايام عمري على الجال

هذا جوابي هاكم اقروا حروفه
وشوفوا وش اللي عاند الحظ لي مال

تمت الإضافة بواسطة : سالم ال فروان
© 2024 - موقع الشعر