شماعة الروتين

هاض القصيد وهيضه ضيقة البال
وكتبت من فيض المشاعر قصيده

قصيدةٍ تشكي على واقع الحال
مدري تزيل الوضع والا تزيده

ما كل ما يطري على البال ينقال
الوضع مزري والمشاكل عديده

تعدد الاطباب والوضع لا زال
في كل يوماً مشكلتنا جديده

اهل المصالح حكمهم بالهواء مال
واهل الذمم ما عاد منهم شريده

أمانةٍ يلعبها كل محتال
كلن يسيرها على ما يريده

الصبر طال و طالب الحق ما طال
واللي سال ما حصل اللي يفيده

قرب البعيد و قربه خط جوال
والتقنيه عن مجتمعنا بعيده

من دونها نقص الفهم والفشل حال
اليا متى ياهل العقول البليده

ما عندكم يا كود تعقيد وإهمال
على المراجع السنتكم شديده

شماعة الروتين للكذب موال
اللي يناقشها ضعيف العقيده

ثقافةٍ تفرض على كل الأجيال
مضمونها التطوير عيت تجيده

مناصبٍ تورث مثل ورتة المال
لا مات شاغلها خذاها حفيده

لاشفت حال الوضع تنبيك الأحوال
حقايقاً ما تنشر بالجريده