انا ياسادة الحفل الكريم وحضرة الجمهور
ابااكسر منطق الروتين واحرق قلب ثواره
مادام ان السنه قفت ولا باقي يكود كسور
وكلن قام يرمي عزبته في حلق مشواره
ابااسرقكم دقايق لا ... ابااسرقكم ثلاث شهور
عساها تكفي العنوان والتفصيل واخباره
وانا ياسادتي ماني عميل ولاني بماجور
ولا تسوى المنابر في عيوني ربع سيجاره
ولاتغريني الالقاب واخر همي الدكتور
لو ان البنج دستوره سلامة قلب بيطاره
ولكن شاعر ومتميز وفي واقعي مغمور
حضوري يفرض اغياب اكثر الشعار واشعاره
تعالو نكشف الاوراق ونسولف مع المحضور
تعالو نحسب ايام العمر واسْنين دواره
ياكثر ذنوبنا وايامنا قامت علينا تدور
ولا ندري من اللي قابض الارواح يختاره
ننام وحلمنا عكاز في راسه ثلاث كسور
ونصحى واحتضار الحلم يشهق ظلم قباره
على الهامش تواعدنا وخل الطابق المستور
وعودنا على الهامش وكلن ذنبه اقداره
مبادئنا مجرد حبر فوق اوراقنا منثور
طلاسم شعوذه يشرف عليها فجر سحاره
نخاف صدورنا ترجع بنادقها عليها تثور
ولا نلقى دموع الطهر واللي مات كفاره
اخاف الوقت يسرقنا وحنا باخر الطابور
وكلن يختلق عذره وتنهش ظهره اوزاره
مادام انا تحاربنا على فنجاننا المكسور
وبراد الظما يغلي رسوله سم فواره
ولا زالت عروبتنا مجرد ماضي وديكور
ولازلنا مجرد جار مايدري بوجع جاره
فلا والله ماحنا على درب الهدى والنور
ولا حنا جنود الله ولا وراثة ادياره
وانا ياسادتي صدري تربى من وجعه صدور
ولا ادري ليه يعزفني هذي الليله على اوتاره
ياجعل الليله اللي جمعتنا منطلقها سْرور
وجعل افراحها من قلب ديرتنا الى الحاره
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.