يا وقت

ياوقت كافي ما بدى منك ياوقت
عذّبتني وأحرقت كل الأماني

يا ليتني في حضرتك ما تعلّقت
علّقتني وأصبحت لجلك أعاني

غرّبتني وأذّيتني يوم شرّقت
وعشري على يمناك صارت ثماني

بأسواقكم ياوقت يومي تسّوّقت
رحّبتْ بي وأهديت عذب الأغاني

وعندك حلمت حلوم كُبرى وروّقت
والحلم يبني عاليات المباني

ظهرت لي في ثوب لجله تشوّقت
ثوبٍ ظهربه كل معنى التفاني

وأنا ضعيف إيمان من خلفك انسقت
وسلّمت لك قلبي وجملة كياني

وأطلقت أنا سمعي لهرجك وصدّقت
كل الكلام اللي تقوله عشاني

بس الخسارة فيك والله توّهقت
ورّطتني يوم إنّ طيفك خذاني

بعد الحلا من مرّ مرّك تذوّقت
واليوم أنا ندمان وأبكي زماني

توّي عرفتك زين يا حضرة الوقت
عرفت طبعك يوم عرفي كفاني

مرة أنا مع طيف حظي تعانقت
وهمّيت تقتلني وتقطع لساني

ومن بعدها لمّيت قلبي وفارقت
وبنيت حلمي في سهيل اليماني

لقيتك تساعد على اللّهو والمقت
وبسرعتك تسبق جميع الثواني

واليوم جئتك لا تحسب إنّي اشتقت
ما عاد قلبي يحتمل جرح ثاني

جئت أتبرى منك من بعد ما فقت
خلاص أنا لله مطلق عناني

وقبل الوداع أقول يا وقت يا وقت
أنته خبيث الطبع رجلٍ أناني

لا تحسبنّ إنّك عليه تفوّقت
أنا بدونك عايش أمن وأماني