القهوه

لـ خالد المخيدش، ، في المجالس والقهوه، آخر تحديث

القهوه - خالد المخيدش

الله أكبر كل مايطري علي الغالي
ضاقت الدنيا علي وزادت النفسيه
 
 
هي دواعي وحدتي والسهر والغربالي
والعنا والحاله اللي للملا مرئيه
 
 
من سبايبها كرهت الأولي والتالي
أشهد إني ميت ٍ لو أن نفسي حيه
 
 
كل ماتلفي طيوفه لا جلست لحالي
فز قلبي فز غالي ٍ لفا غاليه
 
 
أتنومسبه وأشب من الحطب بهبالي
وأنثر الدله لو أنه توها مرهيه
 
 
وأجلب المحماسه اللي لونها كد زالي
وأمليه كفين نقو الخيشه البريه
 
 
أدني البن اليماني من لهيب الصالي
حمسة ٍ لاهي بمحروقه ولا هي نيه
 
 
لاأصطفق ريحه برأسي عدلت مامالي
ثم غدت بين الشعل والحمر ذي وذيه
 
 
قمت أقلبها يمينن نوب نوب شمالي
كنه أبل ٍ رددوها في نهار الهيه
 
 
وأفهقه تبرد على كيفه ومرهي بالي
وأجلب اللي دقته مسموعة ٍ مرضيه
 
 
من سمع صوته يدن برأس قفر ٍ خالي
يجلب الجيران والخطار والرجليه
 
 
ثم أدق بهون وركود ٍ مهو بعجالي
وألقمه مفواحة ٍ بالماء ماهي ممليه
 
 
فوق نصه بأصبعين حسابها يزهالي
وأركيه مقعاد جمر أرطا ومعه غضيه
 
 
لا زمت ثم عاطت بريح ٍ يطيب فالي
أفهقه عن حر صلو النار وأداريه
 
 
وأدغث الدله بهيل وزعفران ٍ غالي
ثم أنوشها من المسمار بس شويه
 
 
دلةٍ وضحا ولا غيره أشوف دلالي
كانها بالسيف والرسلان مامن زيه
 
 
ماينافسها سوى البغداد لي ولا لي
وارد العساف من حايل وأنا شاريه
 
 
ثم أزل الكيف زلة مغرم ٍ مختالي
ببطن غرنوق ٍ نقيت قنادها بيديه
 
 
لاطفح هيله بسبة حادر ٍ من عالي
رحت أقلطها لجمر وجاري بحنيه
 
 
حين فاح الهيل بأفهقها وأرده تالي
فوحتين وثالثه مني ترى قاضيه
 
 
كن فوحه دم رجال ٍ غبنه رجالي
يوم يقلب هيلها بالخلطه السريه
 
 
وأضع الخلبه بخشم الدله المطوالي
وأجلب من الجمر مايكفي وهي مركيه
 
 
وأفتح المقداعه اللي بالرطب مزبالي
ثم أقلطها لطيف الغالي وطاريه
 
 
وأتفنجل من مرار البن كنه حالي
أخذ أربع له وأولع رأس هالملويه
 
 
عقبه أربع لي وأنزل بعدها فنجالي
طيف غروٍ لاعبن يالعن أبو واليه
 
 
مأأكتفى باله وأنا اللي ماكفيته بالي
ويسري الطيف ويجي وأقول يالله حيه
 
 
قمت أرحب به وأقول الله لنا يالسالي
ورحت أنثر دلتي وأستدني البريه
 
 
وأحمسه وأدق وألقم كل هالموالي
وأضبط الدله أنا معزب وأنا الطرقيه
 
 
من سبايب طيفه موسوس ولالي والي
هي جواب لضيقة الدنيا مع النفسيه
 
 
وهي دواعي وحدتي والسهر والغربالي
والعنا وأحوالي المسموعه المرئيه
 
 
وعزتي لي كل ماتلفي طيوف الغالي
أقسم إني ميت ٍ لو أن نفسي حيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر