لاهنت صبّ القهوه البريه

لا هنت صبّ القهوه البريه
الي تداوي علتي ووجاعي

فنجالها لا سيق لي ياحيه
ربّعت لو ما حولنا مرباعي

الله يعينك صبتك ردّيّه
بتعّبك حتى تزين اوضاعي

واقصد واغني درة القافيه
الجزله الي تطرب الاسماعي

ماضاقت الدنيا على الطرقيه
الارض فسحه والدروب وساعي

الزم ماعندي راحتي النفسيه
لو انها تتعب عزوم الساعي

ما غيّرتني الموجه البيئيه
باقي على سجيتي واطباعي

يبقى الذهب ماريته صدقيه
ماهو بزيف المعدن اللاماعي

سلم على وجيه الرجال الحيه
الي تلبي لادعاها الداعي

تحية(ن) مخصوصة(ن) مثنيه
ازفها جزله مع الذعذاعي

اما انت يالي زلتك عفويه
توجع خفوقي وحضرْتك ماتاعي

تدري بحبي لك وصدق النيه
طامع بقربك ياهوى الطمّاعي

ارفق على حالي شوي شويه
وامسح على قلب العنا الملتاعي

لا تعكر بجوي وتلعب فيّه
تراني إليا ضقت مالي داعي

ذكر المفارق لوعة(ن) ناريه
اونس حرارتها مابين اضلاعي

واحذف بها الغتره على الطاقيه
وازرتي من ضيقتي شرّاعي

اصبر واجاهد واكتم الجمريه
واقول يالله لا تقصّر باعي

الصبر نعمه فالظروف السّيه
ولاّ الجزع ماينفع الجزّاعي

طبع الليالي مفرحه مشقيه
والوقت لو ما طاوعك ينطاعي

سدد وقارب واضبط الوزنيه
والهينه مشها ولا ترتاعي

ياشين ضعف الراي والشخصيه
الي مقزر عيشته تبّاعي

يمشي معَ هاذي ومعَ هاذيه
ومن وين ماهبّ الهوى ينصاعي

خلك عزيز وعزتك دينيه
والي تمسك بالهدى ما ضاعي

طيب المبادي قوة(ن) مخفيه
تهزم طواري وقتك الخدّاعي

والعلم والتفكير والجديه
توصلك للغايات والاطماعي

ولاتغرك الدنيا وهي مفنيه
والموت لارواح البشر نزّاعي

الرابح الي جد ونفسه حيه
ساجد لربه مخبت(ن) مطواعي