يا نديبي قوم عجل وصل البريّه - محمد بن دغيـّم السميري

محمد بن دغيّم السميري العتيبي
يا نديبي قوم عجل وصل البريّه

للعقيد اللي نجومه تزحم التيجاني
حين تاصل بادره بتحيةٍ دوليه

والله الله في النشاط أحذر تجي كسلاني
أقف قدمه لا وصلته واستعد وحيه

أعطه تحيّه عقيد تزلزل الميداني
ثم عطه اللي معك وارجع خلاف شويه

واستعد وعط تحيه وانصرف عجلاني
لا تطوّل بالوقوف القائد له رعيه

قائد أبطال الحروب إن جالها دنداني
رجل ومناط بعمل دوله وما سوليه

وقته أغلى من عقود اللؤل والمرجاني
يا محمد يا سند نا سيرتك مرضيه

فعلك يسر الصديق ويحزن العدواني
أنت ماخذت المراجل بالحِيَل عاريه

غير عقب أفعالك اللي جالها برهاني
لا بخيل ولا ذليل ولا أنت والله عيه

جامع ٍ همّة شباب وحنكة الشيباني
وجامع ٍدنيا ودين ومن جمع هاذيه

للمراجل كلبوها يسبق العرباني
لك قصور وسط قلبي بالغلا مبنيه

ما مثل بنيانها عندي ولا بنياني
لو ضربها يا محمد قنبله ذريه

ما تغير وضعها الأول بوضع ٍ ثاني
والله أنى والله معك صافي نيه

وانت اخوي وعندي أغلى من جميع أخواني
لو تناحت بي إخطاي ورحت عنك نحيه

والله أنك حاضر ٍ معيه وفي وجداني
من غلاك ارسلت لك يا أبو عمر برقيه

ولو تساعدني ظروفي كان جيتك عاني
ومرسل ٍلك يا طويل العمر خولانيه

قهوةٍ ما تنبت إلا في جبل خولاني
جابها من يام تاجر جايب نوعيه

للمليك ونائبه ولسيّدي سلطاني
والله أكرمني وأخذت مع الملوك شويه

جاتني منهم عطا ما جاتني بالعاني
نفح جودٍ من ملوك يحتمون الهيه

جابها الله والله ليا راد شي كاني
ويوم بعد اللي حصل قرت وصارت ليه

قلت أبا اهديها لمن يلفونه الشيخاني
والهدايا من على عصر النبي سنيه

سنةٍ مسنونةٍ من سالف الازماني
والهدف تقدير من حي ٍ يقدر حيه

بيني وبينك قسمت الكسب بالميزاني
نصها أرسلته ونص أبغاه للطرقيه

ما تركته شح مير أبغاه للضيفاني
في المشب مطرّفه لدلالي المجذيه

للدلال اللي شواها صالي النيراني
الدلال السبع هن والنجر والصينيه

ورث أبوي اللي ذخرني جعل أبوي اجناني
ما نويت اجوز عنهن زال نفسي حيه

وان لحقت أبويه ارجي رحمة الرحماني
والله أنه ما ذخرلي يا عرب ماليه

غير طيب الذكر مع قاص العرب والداني
يا الله اجمعني نهار الحشر مع ولديه

وأعف عنا يا محل العفو والإحساني
ويا الله إن كاني لغيرك ما رفعت ايديه

لا تخسرني نهار الربح والخسراني
ثم صلاة الله على اللي سيرته مرضيه

خاتم الرسل الكرام وخاتم الادياني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر