مرثية لـ والدي / عايض فراج بن دبيل العصيمي - فيصل بن دبيل

يا شعر هات اللحن وأجرّ موّاله
شاعرك صدره حزين و ضايقٍ باله

ولا له أليا تضايق صدره ألا الله
الواحد اللي جميع الخلق تلجاله

سبحانه المقتدر مالك ملكوته
من جوده و من كََرَمْه وخيره إنساله

يا ربنا يا رحيم و غافر الزلة
يا مسامح العبد ف ذنوبه و ف إهماله

تغفر لعودٍ جمع دنياه مع دينه
عودٍ دموعه ل صوت الحق همّاله

عودٍ سلك مسلكٍ عسرٍ على غيره
عودٍ جمع طيب أبوه و مرجلة خاله

شامخ سوات الجبل قدام عدوانه
و ل ربعه و من نصاه ، يظلل ظلاله

و قد قالوا الناس وقت الموت ما يفقد
ألا حميد السجايا راعي الطالة

ولا الردي لا توفى محدٍ أفتقده
ما ينفقد غير من حرمته وعياله

ولا زبون الوفا عايض عقب غيّب
ما أقول يبكي عليه النجر و دلاله

أقول يبكي عليه اللي سمع ذكره
خل الذي عاشره و إعتاش ب أفضاله

ويبكيه من قفّلت دنياه في وجهه
و نصاه ثم قام لين يخلص أشغاله

لا قال يا عايض بن دبيل قال أبشر
ما والله تروح غير وخاطرك داله

و يبكيه ذودٍ قناه يدور السجّه
ما هو ب قانيه لأجل يكثر أمواله

و تبكي صدور المجالس جلسته فيها
و ناسٍ نشت في ذراه ومحكم أقواله

يزرع من الطيب ف العربان من طيبه
و يقول و يطول مرقاً ما حدٍ طاله

و جمايله ف البشر محدٍ ب محصيها
يفرق ب طيبه سوات النايد لحاله

مرحوم يا شايبٍ بالطيب وصّاني
يا جعل في جنة الفردوس منزاله

يا رب فاوله فاله في وسط قبره
و ف الآخره لا اهتنى في فاله .. عقاله

ويا رب يا منشي الغيمه و مجريها
ب أمرك يهلّ المطر لا خيّل خياله

ترسل حقوق الخيال ل قبره و يمطر
و تبلّ طاهر ثراه ب غيث همّاله

والموت دربٍ جميع إبن آدم يمرّه
و لو ف الزمن حد طيب .. يخلد رجاله ؟

ما مات قبله نبي الله و مرسوله
أفضل بشر مصطفيه الله ب إرساله

وعسى الله المقتدر ب أمره يقدرنا
نمشي على ما مشاه ونفعل أفعاله

و نذكره مع كل سجده لله و ندعي
يا جعل في جنة الفردوس منزاله

© 2024 - موقع الشعر