قصيدة ذياب بن عبود العصيمي
لله من قلبٍ همومه تلاطم
مسيل سيلٍ سال من عقب ديمه
تقفي وتقبل به تفرق وتلتم
تفرحه مره ومره تضيمه
موجٍ تدافع فوق مع غبة اليم
عوجٍ تولج القلب مع مستديمه
اصبر على الحسرات ياكم وياكم
واللي يكن الصدر ربي عليمه
واليا بدر مني خطاي اتندم
ومن خلقتي والله مااحب النميمه
ولا امدح الممدوح وابعد عن الذم
واربوا بنفسي عن دروب الذميمه
واليا دعاني داعيٍ قلت له سم
احب هقوات النفوس العظيمه
احب سمح الطبع والراي الاسلم
احب سمحين النوايا السليمه
ولا اقول للي يمشي التايعه تم
ولا صغير رايٍ من عقولٍ سقيمه
ولا بان لي بعض الجفاء من ولد عم
ادمح له الزلات واذكر قديمه
والشمل لابده كما قيل يلتم
مدام حانن والليالي مقيمه
مني لابو سلطان اللي تقدم
فالماقف الغصاب وارغم خصيمه
شعره كما البلسم ومره كما السم
وياقف مواقيف الرجاال العديمه
من الصخر ينحت ويجذب من الجم
وبالصدق تبين له فعولٍ قديمه
بين العرب مفهوم ماقال قد عم
ويشهد على ماقاله الكل قيمه
والنور بان وساج بالليل الاظلم
والصدق يقهر كل راعي ظليمه
وماكنه الخاطر يبين من الفم
ويبين لك نوا الفتى من نديمه
ويضيع معنى العلم في مجمع اللم
وتبين بارقاب البكار الوسيمه
وسلم على من شيف للقرم واسلم
سلامي ياللي توصل العلم تيمه
***
رد كديميس
ياذياب جاني منك خطٍ منظم
وقصيدةٍ فالوقت هاذا يتيمه
خطٍ على شتى القوافي مترجم
ومعناه ينبي عن شهامه وشيمه
فيه الكلام اللي على اهداف ومهم
واعز واشرف من كلامه زعيمه
اللي بجزلات القوافي تكلم
واعوج من عسرات القوافي يقيمه
مهيب بدعه لك بالاعلام مسهم
وانته حفيد اللي يجندل غريمه
ياذياب جدك راعي الغوج الادهم
اللي لاركبه يفك الزعيمه
اللي لا حثه على الخيل واسهم
مايسنح الكردوس يضرب صميمه
بشلفاٍ مضريها على نثرة الدم
دمٍ عزيز من صدورٍ حشيمه
من الآد عاصم فاللقا والمهاجم
يرخون لأرقاب المهار الشكيمه
لا جاء النهار اللي جموعه تلاكم
حريبهم يصبح تناعا حريمه
قومٍ لهم عادات وسلوم وشيم
ويلوذ بحماهم كبير الجريمه
ركنٍ من الهيلا هل الصيت الافخم
اللي بنوا في منبر المجد خيمه
يوم القبايل والقبايل تزاحم
حريبهم يصبر بغبن الهزيمه
حريبهم باحلى المنام يتحلم
يشوفهم بالقلب والعين نيمه
مركاضهم فيه الفقير يتغنم
لاحضر تقسيمهم للغنيمه
ويشبعبها السرحان والطير الازقم
كلٍ ينادي صاحبه للوليمه
يا ما نحوا عن نجد من جمعٍ ارخم
وتجرع الذله وكبر الثليمه
وياما انكسر من دونها سيفٍ اعسم
عقب علج بمتون خطو الصتيمه
وعندك خبر يوم الثلاثه تحاشم
والكل منهم ضربوه الخريمه
عسى السحاب اللي قنوفه تهاشم
يضفي على مثناة نجدٍ هديمه
جعله على مثناة نجد يترزم
وتسيل وديانه ويحيي هشيمه
من ظلم لأطراف البلاد الموشم
ومن المخامر للصراديح ديمه
يسقي الديار اللي بها الجار يحشم
ولا طالت ايامه يزود اتحشيمه
ولا هوب لا يظلم ولاهوب يهضم
ويقلط على راس وفقار العزيمه
والضيف في لوذات الاسعار يكرم
لامن كلٍ قام يكرب بريمه
لا من بعض المجتمع قال له قم
نصا الديار اللي بااهلها كريمه
دارٍ بها الهيلا تحكم وتنعم
بالامان والايمان يالله تديمه
مدحتني ياذياب عقب المساوم
وعقب انتهى صبر العقول الحليمه
عندي خبر كشف المغطى محرم
ولاني بحلل حرمته وتحريمه
لكن بعض الناس قام يتطشم
وصلت مكاتيبه وشفت اتعميمه
كتبت له مكتوب قبل الملغم
وعلمت من لا سر فيه اتعليمه
قال ادخل الميدان والبادي اظلم
ومن مات يذبح له وليه تميمه
ويومن مقباس المشاكل تضخم
وصارت علاقات قصارنا وخيمه
حطيت لي في منبر الحذف مرجم
وشاركت في نسف الهدف واتحطيمه
الرجل لا نابه من النايبه هم
يضرب على سيم المحاله بسيمه
والبيت له بيبان والثوب له كم
والسيل منبع قوته من يديمه
وانا ورثت الشايب الذيب الاسحم
مودع معاشير الدعاوي عقيمه
دحيم لا قامت ركبهم تداحم
مثل الجمال اللي على الماء محيمه
يدحم بجنبٍ لا تزعزع ولا اهتم
جنبه متين وحجته مستقيمه
لو كان حبل الخصم مبرم ومحكم
لدحيم حجه فالمحاكم حكيمه
وان جاه محتاجٍ جداه يتهضم
وهذي فالوقت الاشهم جسيمه
كم واحدٍ لاضامه الوقت ينضم
لدحيم حيث انه يزيل الهضيمه
ماني مثل دحيم مار اتعلم
اخذت لي من بحر عرفه قسيمه
اليا طرالي ماقفٍ فالمخاصم
يزود عندي فالعزيمه عزيمه
هذا الجواب وبالتحية مختم
مسك الختام ازكى السلام اتختيمه

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر