قوقل و توتر.

راكب اللي كنه القطن من زود البياض
جيبً اليا دقِ سلفه تقل دقّة وتر

افجحً رفارفه جنب كبوته عراض
لو تطول ابه المسافات عزمه مافتر

قام ينهض مقدمه يوم عقبت الرياض
عنده الخمسين كيلو تقل خمسه متر

يرشح البنزين رشح الضمايا للحياض
مايكفي تانكيه ثلاث امية لتر

جلده امع الطرقه ايِهيض اللي مستهاض
والنفود اللي كما القور يبترها بتر

فوقه ابنصا ديارً عليها البرق ناض
هي مراد القلب ومناه كان الله ستر.

يستريح البال بين المسايل و الفياض
لا مطرت غراً بردها مثل بيض الغتر

ولا انتشيت امن الطبيعه بجوً مايعاض
ماحسدت التاجر اللي على ماله قتر

اتونّس واتجنّب ردا القوم البغاض
وآدعي الله بالشفع وآدعي الله بالوتر.

ابدوين طاب حضي مع الناس الحضاض
مالي بصفحات قوقل و صفحات توتر