ياكثر ما خاويت من جملة الناس - بندر بن حسين المرشدي

ياكثر ما خاويت من جملة الناس
لكن مثل الليل مالي مخاوي

اسهر معه وابادله ود واحساس
واشكي عليه هموم قلبٍ شقاوي

الصاحب اللي لا بغيته فلا باس
القاه وافي للرفيق المهاوي

هموم قلبي تختفي تحت الأنفاس
ما يطلع في سرها كل غاوي

اخفيتها بالصدر عن كل بلاس
من خوف لا يفرح عليّ الدناوي

لا اقبل ظلام الليل تظهر له اجناس
وأقضي مع مخاويّ ليل سراوي

يا ليل انا باسألك وشفي منحاس
ما شفت من دنياي غير البلاوي

مشيتها بالعزم ما صابني يأس
واجهت حيلي بالحيل الهقاوي

وقمت ابتعد ما امشي مع زحمة الناس
وقضيتها ايامي وحيد خلاوي

اعاني جروحي ليا هب نسناس
وارفع بعال الصوت وين المداوي

ولا شفت لي في زحمة الناس قرناس
اللي يشد به الظهر في العزاوي

والقلب دقاته كما قرع الاجراس
اليا طرت ذكرى حبيبٍ غلاوي

ترف القدم رمز الشرف طيب ساس
هي منيتي لو انها بالمناوي

فارقتها وامشي بلا فكر واحساس
وانا لحمل البين مانيب قاوي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر