البارحه يوم اكثر الناس غافين - بندر بن حسين المرشدي

قصيده موجهه من الشاعر علي فرحان اللتليدي
يقول من لاعه فراق المحبين

وامسا يجر بونته كل طاروق
والدمع في خده من الحين للحين

ماينغسل لوجمعو كل مسحوق
بلاي من وقتاً غدى فيه تلوين

ماينعرف به عصر من وقت اللشروق
وقتاً ضهر بالحال من دون تحسين

حالي براه الهم والبعد وعشوق
ابشتكي حالي لناسً قريبن

ناسً تقدر بالهوى كلمة الشوق
بستفزع اللي لوهمومي ملايين

اروح له سجين وعود مطلوق
عز الخوي لاصاروا الناس صفين

نعم العتيبي رايته دايماً فوق
والجد روقي لانخا الربع الادنين

لاصارت الدعوى بها دم وعروق
الحال صار اليوم يافزعتي شين

بين العرب كني من العقل مسروق
سبايبي كله من البعد واللبين

وفوت الديار اللي بها لابس الطوق
فرقا وليفً صارلي عنه عامين

خلً غلاته فايقه كل مخلوق
حبه بقلبي حل وسط الشرايين

انشهد ان حبه عن الناس مفروق
ماتنجرح روحي ولا تبكي العين

ياكود لجله دمعتي تصبح بذوق
اتلا العهد به في ضحى يوم الاثنين

ساعة لقيته واقفاً داخل السوق
واقفا بقلبي ورتحل به على وين

مابنشده لانه ترى اعز مخلقوق
وشحيلتي يا بندر حسين هالحين

يقولها من صار له قلب محروق
رد / بندر بن حسين المرشدي

البارحه يوم اكثر الناس غافين
العين شيطان السهر ساقها سوق

جلست لين اوحيت صوت المواذين
اغفي دقايق واخذ شوي وافوق

استحضر الهاجوس وقرا العناوين
واختار من جزل الصعيبات منطوق

يامرحبا ترحيب غالي بغالين
تحية ً تشرح صدر كل مخنوق

أللفيت يانسل الكرام الميامين
وابشر بعزك لنتخيت بولد روق

وانته عزيز ومن رجالً عزيزين
قدرك على عيني وعلى الراس من فوق

هذا وعد وصل والوعد عندنا دين
لاقف معك دامك من الوقت مزنوق

خذني على يمناك فالعسر واللين
وقفت شرف ماتقبل الغدر والبوق

امشي معك ياعلي ممشاً على الدين
مافات شي وكل مطرود ملحوق

ان كان في قلبك من الشوق جرحين
والله ملومك في وطن حالي الذوق

دار الربوعه شوفها يسحر العين
ارضً سماها غيم ورعود وبروق

يكفي فخر فيها الرجال العريبين
من جالهم يصبح من الهم معتوق

وكانك تبي تقطف ورود البساتين
ترى الورود الها قوانين وحقوق

ماكل من يازن يعرف الموازين
ولا كل صقارً معه وكر وسبوق

وليا زرعت وصرت بين اختيارين
عليك باللي كلها ضل وعذوق

وبختصر لك كلمة ً بين قوسين
أغنم ترى دنياك سابق ومسبوق

وأنا حياتي بالهوى مابها زين
قضيتها محروم ماني بمرزوق

بااااقي بقلبي من عنا الحب جرحين
بين الحنايا قطعت كل معلوق

كله سبب ياعلى مكحولة العين
ألياقبلت تاطا على الارض برفوق

مرباعها في نجد دار السلاطين
مع ربعي الهيلا هل الخيل والنوق

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر