اكثر العالم تضيق من الصرااحه - عبدالله مرزوق المرشدي

مايسر البال ويزيد انشراحه
غير طاعة من خلق فالجسم روح

والبعد عما يسد النفس راحه
في كلام الجد والا في مزوح

لازم الشده يجي معها سماحه
كان تقدر للجزاء خلك سموح

مايغثك غير من فيهم وقاحه
لابلاك الله بهم وانته نصوح

مايهم القلب لو زادت جراحه
المهم اش قد تاثير الجروح

لايغرك ضحك من يكثر مزاحه
يمكن انه لاختلى يقعد ينوح

شوف صدري فيه للضيقات واحه
رسمها بالعين ياضح لك وضوح

مابقى للهم في قلبي مساحه
كل جزءٍ فيه بهمومي يفوح

اتصبر واطلب الله الاباحه
واكتم الاهات ماودي ابوح

مابغيت افصح واخليها نياحه
بس وقتي دوم بافراحي شحوح

كل صدرٍ فيه للاحزان ساحه
غير ساحات المسره والفروح

بس بعض الناس باسلوبه بجاحه
دايما تلقاه في هرجه لحوح

اكثر العالم تضيق من الصراحه
بس ضيقة وقت ماتبطي تروح

لاجلس وحده صفق راحه براحه
وايقن ان العلم مايبغى شروح

في بحور الشعر يازين السباحه
ومن خيوله ماحلى عسف الجموح

لاكتبت الشعر ودي بالفصاحه
لان شعري دايما قافه يلوح

© 2024 - موقع الشعر