لابس الزهري

حرام يا لابس الزهري.
تنبش من القلب مدفونه.

لولا العهد ساكن بصدري.
نقضت عهد ٍ عليّ صونه.

بيّحت سدي على صبري.
زول الغلا داخل عيونه.

بْضحكته مدي و جزري.
وسط الحنايا رسم كونه.

مزيون والحب له عذري.
والزين باسمه ينادونه.

كيف المحبه على جمري.
اضرم على زوله و لونه.

في عينها فكرها مقري.
مكتوب قلبه و مكنونه.

الثغْر طاهر كما شعري.
ريح النفل فاح بلحونه.

غرو ٍ بصدره فتح قبري.
من كوكبي ما يحسبونه.

فرصه بعدها ولد كسري.
احروف الندامه يزفونه.

ضيعتها والبقا بعمري.
والنفس ماهي بمامونه.

شارع خديجه قبل يدري.
كبري الميه لو تعرفونه.

ثالث اشاره على خبري.
مشفى الهدا فيه مزيونه.

فيه العذارى به البدري.
وكثار عجزوا يصيدونه.

مابه تكبر ولا عصري.
اخلاق يالغيد تفدونه.

من زارها ياخذ الوزري.
وابليس لعّاب من دونه.

دكتور دكتور لا تطري.
اللي تشوفه يشوفونه.

القلب نبضه لها حصري.
تكفون ياللي تعرفونه.

خلوه يقراني بْحبري.
يلقا خفوقي ومضمونه.

هرجه كما فايح العطري.
يفوح جوفي على هونه.

من يمنع العطر لايسري.
لو فاح صعب ٍ تردونه.

ليته يجيني / يجي جبري.
والقلب ودواه في جْفونه.

بعطيه قلب ٍ هوى بدري.
يرويه من صافي مْزونه.

لو كان له خلّ مع عمري.
املوك المحبه يعذرونه.

بنسى طيوفه بقا نهري.
والقلب كآن الله بْعونه.