تراحيب

لـ ، ، بواسطة عشيان بن سليمان، في غير مُحدد

المنسابة: ترحيبيه لشاعر عشيان الرويلي بمناسبة زواج أبنه

يالله ياللي خالقا ً كل الارواح
ياواحد ٍ نرجيه رحمه وغفران
ياللي كونت الكون واجريت الارياح
ومنجي سفينة نوح من وسط طوفان
خيرك كثير ولا انت بالمد شحاح
وحوشا ً بليا أرضاك يارب خسران
يالله دم لنا السعاده والإفراح
عساها تبقى للإجاويد عنوان
حددت وقت العرس بالكرت بايضاح
وطبعتها لجل الرفاقه والاخوان
من زارنا نسعد بشوفه ونرتاح
ونجيه با افراحه يا حل ديوان
ومن اعتذر ماني على الناس لحاح
انقدر ظروفه على كل الاحيان
حنا هدفنا جمعة العز ومزاح
وناسة ٍ يطرب لها كل ديقان
نبي نتذكر عن لنا ماضي راح
ناخذ بها بالوقت ذكرى وشرطان
من حسب الدنيا لقى ما بها ارباح
سفينة ٍ تبحر ومن دون ربان
تلقى مراسيها بها اطلال واشباح
وتلقى شواطيها بها افراح واحزان
الرابح اللي حافظ الدين بنصاح
خمس الفرائض صانها بصدق وايمان
يطلب رضى الله بالمسيه والاصباح
ويترك دمر سية فلان وفلنتان
من خوفي يسوي لها ريش وجناح
يغتابها مبغض ويجرح بها إنسان
والدين نفى الهمز واللمز بجراح
ويحثنا على التواظع والإحسان
بعض الكلام ٍ مشبهن طعنة رماح
واجارنا الله عن عمل كل شيطان
للصدر قفل وللمواضيع مفتاح
والأدمي فكره له العقل ميزان
أخشى لاتفسر معانيها على ناح
وضحتها عن قولة ٍ قيل غلطان
العفو ياللي تكسبون الأمداح
يا اهل السخا والطيب طلقين الايمان
حياكم الله يا اهل الجود وانصاح
على سنام الحيل وذناب خرفان
مع دلة ٍ بها ازرق العود يافاح
فنجالها يغدي خوى كل تعبان
يا مرحبا اعداد مابارق ٍ لاح
سحب من المنشى تهشم بها مزان
ترحيبة ٍ اعداد طشه ليا طاح
نزفها بورد ٍ وعنبر وريحان
والكل منكم لصعيبات نطاح
والكل منكم باللوازم بليهان
وانا مسرور بشوفتكم ومرتاح
عبرت ماكنيت يوم الهوى زان
كل ٍ على ماقيل والجود نضاح
ماقل دل وزبدة الهرج نيشان
اخذ جزيل القاف والهزل ينزاح
من سوقهن ناخذ جزيلات وسمان
يامرحبا مليون والبال منساح
ألف هلا يوم ٍ دعاكم عشيان
وصلاة ربي عد ما خط بالواح
على رسول ٍ هادي خير الاديان
_______________________
شعر / عشيان بن سليمان

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين