عبدالهادي بن سبيله الشمري

سحبت جيبي من كراج الطبيله
لاجل العزيمه ملتزم في وعدها

وجينا لعبدالهادي إبن سبيله
حيث المراجل ابوبدر وجدها

بنى إستراحه فوق راس الطويله
مثل عيون الجوف كل ٍ وردها

وأحرص على الطيب بإي وسيله
وليا عرضت لي دعوته نعتمدها

ولاهي غريبه لويجينا نجي له
والسلم واحد والديانه عمدها

حيثه عزيز ٍ عندنا ومن قبيله
شمر اهل الطولات محد ٍ نقدها

كبار الصحون وكاسبين النفيله
صقور الحرار اللي ينومس هددها

وليا إعتلى خيالهم بالكحيله
ماينشد عن العداء وش عددها

وانحمد الله قلتها ولي فصيله
من اهل العليا والرجال تحمدها

وليا ولع زنادها بالفتيله
إللي نهار الكون يذكر لكدها

من صلب وايل كلنا ننتميله
وأفعالنا بالطيب ماحد ٍ جحدها

وإدخل على الله عن علوم ٍ هزيله
والحظ ماهو سلعة البيع زدها

وكل القبايل لها إفعال ٍ جزيله
ولانهضم حق العرب وإضطهدها

ورضى البشر من غاية ٍ مستحيله
لكن قول الصامله مابعدها

والفضل للي لهم سيوف ٍ صقيله
آل سعود محللين ٍ عقدها

وإن لاحظو بالحق عيله وميله
اهل العوجا باللوازم سندها

وصلاة ربي عد ماسال سيله
على النبي اعداد ما إرزم رعدها

عشيان بن سليمان النصيري