خاله المتوفـى رحمه الله عبدالهادي بن راجس - راكان بن بدن

جاني اتصال بيوم الأثنين فزيّت
ماللبشر فأمر الإله استطاعه

قالوا توفى خالك القرم فالبيت
جاك الكلام اللي يهزّك سماعه

في ليلةٍ فيها من الخير توقّيت
ليلة قدر فيها تحلّ الشفاعه

لو البكا ينفع يا ابوسعود هلّيت
دمعي عليك اربع وعشرين ساعه

راضين بأمر مدبّر الحي والميت
اللي له ارواح الخلايق وداعه

مرحوم ياللي مابعد يوم زلّيت
في طاعة المعبود سمعٍ وطاعه

وعلى المراجل والمعالي تعلّيت
دمث الجناب وغاليٍ فالجماعه

كريم جاه وللمناعير لا جيت
فزوا لك العربان قدر وطماعه

مقدام ربعك ذايع المجد والصيت
أنته عمود البيت وأنته شراعه

تبكيك روضة مسجدٍ فيه صلّيت
وتبكي على فقدك رجال الشجاعه

مهما كتبت من العزا فيك مااوفيت
بعدك كسبت من القصايد مناعه

ياشعر بعد اموادع القرم مليّت
طاروقك بسمعي كرهت استماعه

مات الجزيل وبعد موته تدنّيت
ماعادلك في سوق صدري بضاعه

للصبر والسلوان ياربي انحيت
اطلب رضاك ورحمتك والقناعه

يارب تعلم ماقد اعلنت واخفيت
ارفع لك آكُف الرضا والضراعه

في جنة الفردوس ياحامي البيت
مع النبي وآله ينول الشفاعه

ولو البكا يرجع لنا الميْت هلّيت
دمعي عليه اربع وعشرين ساعه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر