رثاء ومواساه

البارحه مانامت العين ياصفوق
يا ابو متعب شفت الضمير تعباني

ماهو على مردع الخد مدقوق
وليا مشة غنجته بطعجاني

على ربوع ٍ للمعادي بهم عوق
وان حل عن قطيهن حندواني

يوم الجهامه يوم نقضي بها حقوق
من رماح حتى وادي المزرقاني

عيني تقل في جفنها الملح مسحوق
مانمت واطلب الله المستعاني

هزت شعوري واختلف كل منطوق
واوجست شئ ِ بالظلوع المحاني

حيث الحشى طبه صعافيق وخفوق
وعجزت اعبر عبرة ٍ من لساني

جانا الخبر قلنا عسى ماهو ماثوق
عساه كذب وجايبه بوبهاني

قالوا سمعنا بحادث ٍ كان مسيوق
شيخين راحوا والمقدر ثواني

مساعد اللي بالرجاجيل مرموق
ونسايل القعقاع عرب المجاني

لو الاوادم حط لأعمارهم سوق
ماراحوا منا طيبين المعاني

ولو أنها فزعات ومماسك حلوق
تجي اهل العليا نهار الكواني

لكن مقدر والقدر ماهو مسبوق
ماقدر المولى على العبد كاني

عسى السحاب اللي من المزن حاقوق
يسقي ثراهم وابل ٍ ريهجاني

وبيوتهم بأحفادهم تنشمخ فوق
حيث العوض بعيالهم بالمكاني

ولو المنايا بالبشر عندها فروق
تبدل الإجواد بالمهلقاني

ولي يادنيا ماغفل منك مخلوق
ماسالم ٍ من لوعتك ميدماني

لو مابك الميلات والظلم والبوق
حلو ٍ جنابك يطرب البهلواني

تمشي السفينه والنوافذ بها شقوق
وشراعها بين العرب طلفحاني

ربانها يجي على كل طاروق
وليا بغت ترسي بليا مواني

ولو كل من يطرد من الوقت ملحوق
كل يحصل غايته من زمانيط

لو التمنى مالقوا بالمنى ذوق
هيهات والله ماتفيد الاماني

وين الأذان وين عنتر وبن روق
وين العواجي وين شيخ قحطاني

أطلبك ياللي ناصر ٍ سيف فاروق
حسناك ياللي منك كل الاحساني

وصلاة ربي عد ماطال زملوق
على النبي اعداد صوم رمضاني

____________
شعر/ عشيان بن سليمان