بيض الحمام عشر طعش

لـ عبدالرحمن غانم الدوسري، ، في العائلي والاجتماعي، آخر تحديث

بيض الحمام عشر طعش - عبدالرحمن غانم الدوسري

معقول عاد ياسيادة الخبير
ماعندنا في القائمة إلا بيان
يضم ستمية عشرطعش ألف فقير
عفوا .. كفى
ياخي أنا
وهو أنا
عمر صبي
وأنا على الكرسي مدير
قصدي غفير
والحين ماعندي سكن
أو حتى عشة في مخطط مقبره
 
ومعي عشر طعش نفس
بنت وولد صغير
صحيح نسرق كل غازات المصانع في هدوء
لكن بكل يوم نجلس نحتفل
جلسة بخار وقسطره
 
إلا بجد ياكبير ياهمام
وش رايك نطيّر نعام
ولا بلاشي خلها
تعال عندي لعبة احلى من العسل
أبدا أنا :
 
كم ظنك يبيض الحمام؟!
عشر طعش !
مستر كارد أبو قحش
حر و طفش
والسوق مابعد انتعش
والاقتصاد راح فيها وانكمش
 
قثدي هذيك اللي يقال أثهم عبث
خطأ خطأ .. آسف أنا
القافية أصلا على
إقلط تعش
وحب يدك وخشها
 
تعال نبدا من جديد
ونشوف كم سعر الحديد
لأن هذا يهمني
في كل يوم امسي على الحلم التليد
على افتراض
آخذ تورق إقتراض
لكن مافيش
البنك مايقرض محيش
بذمتك هذا كلام !
ياخي ولو نقطة نظام
تنهي مآسي حلم بيت المسخره
 
في كل يوم أبني الأماني في زماني بالحلم
ودي يكون لي قصر مثل اللي شفته بالفلم
أو حتى شقفة ( دي بلوكس )
مساحته : أنا قنوع .. جدًّا قنوع
حوش و مقلط كبر حوض ( الهاي لوكس )
 
مع الأسف
إحساسي أن الحلم طار
وأصحي محمل بالأسى والإنكسار
وآدور في كل المداين شايلن هم الصغار
ومسحاة فوق الكتف ماكلها الصدى
وسيرتي المحنطة
رقم مميز ضمن أرقام انتظار
في قبر وسط المحفره
 
وساعات أقول يا عسى وعلَّها
باكر أفوز بمكرمة وأفلَّها
وأردد النشيد فوووووووق
( وفو ق هام السحب ) يامجدي التليد المفخره
 
غنوا معي ضحك وبكي
نشيد عز وفشخره
 
حنا الوطن وأهل الوطن
صرنا عبيد ومسخره
 
والتنمية حكي بحكي
حفلة وطبل ومبخره
 
وحنا الوطن وأهل الوطن
فقر ومرض رجل ومره
 
وحنا الوطن أهل الوطن
وحنا الأساس اللي عمره
 
حنا الوطن أهل الوطن
والدرع لو جار الزمن
 
حنا حماته من يقرِّب من سياجه ننحره
لكن رجا وآخر رجا
نبي نغني بدون طبل ومبخره
© 2024 - موقع الشعر