ياميرنا احمد يامير العز والجودي - محمد البياضي

من كثر ماهل دمعي جرّح خدودي
مجراه من فوق خديني نجض كيه

ابكي واكف الدموع الزرق وتعودي
والوقت يمضي وناري بالحشى حيه

من بُعِد ربعي وبعِد ابوي عضودي
وايضا العمام وبني عمي ومن ليه

اليوم عمري ثلاثه سنين و(سعودي)
واعيش خارج حدود ارض (السعوديه)

واختي صغيره وعن عامين ما تزودي
ونقيم فبلاد مصر بدون جنسيه

من مسلمه بنت مسلم ماهو يهودي
ومن اب مسلم سعودي وام مصريه

وقران شرعي بموجب عقد وشهودي
حلال ومْجِينا مابه حروميه

ونعيش في بيت جَده رجلها عودي
شايب وسنه كبير وحالته سيه

واحيان في بيت خال وماهنى فودي
مستور حاله مابين الشمس والفيه

واوقات في بيت خاله بيضها سودي
في بيت ما فيه لا كهرب ولا ميه

ننزل ونرحل بحال الغبن والكودي
متنقلين وتقل حنا جلاويه

والام معنا وتبذل كل مجهودي
لا كن بلشت ما بين البير والطيه

والوالد يمرنا فترات ويعودي
واحيان ياليت مره كل حوليه

ظروف شغل وحسب ما وقته يجودي
اما بجازة سنه والا اضطراريه

يرسل لنا اغراض وايضا يرسل نقودي
ماهو مقصر بنا لكن ماهيه

حاول بشتى الطرق والباب موصودي
وياكم خطاب ٍرفعه وكم برقيه

من شان مابين ربعي يثبت وجودي
بموافقه مير ماتحقق لنا شيه

واخشى الطريق يحدر ما ياخذ سنودي
ونعيش في قهر لا روحه ولا جيه

مااشوف ربعي ولا اعرف ديرة جدودي
واختي ما تعرف معي لا ذي ولا ذيه

هذا وانا تو باقي لين ٍعودي
والسن دون الدراسه الابتدائيه

وشلون فيما بعد قدام وصعودي
مدري وش يصير فينا كل ليليه

وان كان فات القطار اعيش مضهودي
وانا من العلي والعزوه بياضيه

ومادام انا واحد ٍمنهم ومعدودي
مشفق على شوفهم مما لهم فيه

ياميرنا احمد يامير العز والجودي
يابن سعود الوفا والطيب وحميّه

ازريت يامير لآصل نقطة حدودي
حتى اشرح الوضع بالطرق النظاميه

عسى لاهب البراد وذعذع النودي
بيوت شعري توصلها الشماليه

ارسلتها لك وانا ضايق ومحدودي
من مصر لسموكم ياطيب النيه

كل السبل قفلت والحبل معقودي
كني سجين وكن القيد في ايديه

بموافقه من سموك تطلق قيودي
وادخل وطنا واعيش بكل حريه

والشمل يلتم لا حققت مقصودي
ببوي وامي ولقيا الاخ والخيه

وابفخر وبفتخر وآقول انا (سعودي)
فوق ارضنا وفي ذرى حكم (السعوديه)

مناسبة القصيدة

أخي فيصل البياضي تزوج من جمهورية مصر العربيه ورزقه الله تعالى من زوجته في مصر بطفل وطفله وحاول اكثر من مره الحصول على الموافقه ولم يحالفه الحظ حتى الان ،فتأثرت من وضعه ووضع اطفاله وهاضت قريحتي بهذه القصيده على لسان ابنه عبد الله بن فيصل البياضي والبالغ من العمر ثلاثة سنوات والذي مقيم في مصر هو واخته مع والدتهم ، وهي موجه الى صاحب السمو الملكي الأمير / احمد بن عبد العزيز آل سعود حفظه الله يطلب منه الموافقه بدخولهم الى المملكه بالطريقه المشروعه لكي يستقر وضعهم على ارض هذه البلاد الحبيبه الطاهره المملكه العربيه السعوديه .
© 2024 - موقع الشعر