وانا ماني بنت ابوي ان كان قلبك ماوجعته

دامك أنت اللي م/لبى ولا تربى ولا سمعني
قول وشوله ألبي عقب كل اللي سمعته

سم طعناتك تسرب في حناياي ووجعني
وأنا ماني بنت ابوي ان كان قلبك ماوجعته

قلت لك دربي عسير وأنت ياابن الناس طعني
شوف نبضك لو تراقص لجل غيري لك قطعته

لا تقول الصدر صدري ولا تقول أنه مايعني
ترى بااسبابي تضيق بصدرك المغبون سعته

وأنا والله لو بغيت آصد شوقي مادفعني
حاكمه نفسي بنفسي وراسي بعزه رفعته

الهوى المجنون هذا ما ملكني ولا قلعني
من بدى كذبك وحبك شمت ياهيه وقلعته

واللي مثلك لو تبعثر في غرامي ماجمعني
ماوصل صدقي وعطائي ولا وصل للي جمعته

وانت فاشل لا تحاول انك بيوم تقنعني
لا تؤول هالخساره وعقلك بطهري قنعته

لا تقول انه بقلبي شخص غيرك قد منعني
انا قلبي قبل اعرفك عن هوى غيرك منعته