خيل ابن مكتوم - فواز فارس الدواي

سارت القيفان والنيه مطيه
لو يطول الليل ولا مايطول

يلعب الدواي والمعنى دويه
لادوى قافه تثمنه الفحول

كل ماأشرب من قناد الشاذليه
المعاني داخل افكاري تجول

يابنات الريح به روحه وجيه
خلجن قدمي على صوت الطبول

خيل ابن مكتوم نطاح السريه
هي جمال الخيل مابين الخيول

عشت يالمكتوم يازبن الونيه
شيخن وخيال في خيلك تجول

ابن راشد من مواكر صيرميه
دلل الفرسان من عرضن وطول

انت خيال الاصايل ماعليه
وانت شيخ الفعل لاجن الفعول

بالكرم يمناك دسمه بالعطيه
لاعطيت اتحير اكبار العقول

نظرتك ياشيخ نظرات الحميه
والحميه باينه من دون اقول

انت سويت البطوله العالميه
مايلن للخيل يانعم الميول

والاصايل نازله فيها وصيه
قالها الله في كتابه والرسول

عاديات وزينهن به جاذبيه
يقمرن وحبهم سحر معمول

اتغزل في الكحيله والعبيه
ابغى اغازلهن وانا كلي ذهول

والشويميه معاها المعنقيه
كنهن ظبين من اظلاله جفول

والكروش الوافيه الخيل الهديه
رسها طيب من خيار الاصول

(((ياحلو صقلان زينه كالبنيه)))
كنه المزيون ابو رمشن خجول

عاش ابن مكتوم وخيله مع ادبيه.؟؟
عاش شيخ الطيب شيال الحمول

قالها شاعر بحاسيس ابدويه
رابي احساسه على رمل السهول.

يرقب النجمه بليله سامريه
لاغدى نور القمر توه يزول

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر