ردية بين فواز الدواي واحمد الفجي

لـ فواز فارس الدواي، ، في الملاحم، آخر تحديث

ردية بين فواز الدواي واحمد الفجي - فواز فارس الدواي

سار القلم يكتب جزيل المعاني
يوم الفكر وسطه كثير المعاني

ابيات شاعر صاغها فن وأحساس
والخبره اللي مرته بالزماني

عنده شعور تجيب حلو التعابير
يقصد ينظمها بحلو اللساني

واليوم بكتب لي قصيده بشاعر
شاعر وله بالشعر وزن وكياني

محشوم عندي وله قدر ومعزه
من فخذي ابناخي وحسبت أخواني

انا اشهد انه وافين بالصداقه
طيب وجدانه إكرام اليماني

بديدتن ياطيبها من بديدة
امكر من رجالهم مايهاني

وقت الكرم ياطيبهم بالمكارم
لاصار ماجوب الشياه السماني

وقت الِشجاعه يذهلون الشجاعه
رجالهم مثل الاسد مقدماني

قبيلتي وافخر بها من قبيله
في جيلنا هذا ويوم الحصاني

تشهد قبايل كل شبه الجزيره
خوة رشيدي يالله المستعاني

خويهم يضحك حجاجه على طول
ويلقى السعد ويالفرح والأماني

يوم السيوف ويوم ركب الاصايل
ويوم العقيد يغير ماهو جباني

ويوم البنادق والفشق والمحازم
والشلفا اللي مانقلها الهداني

واليوم انا بذكر عيال الفجوجي
نسل الفجوج معربين المجاني

من سلسلة رمثان كل الفجوجي
والناس تعرف بين قاصي وداني

عجارمه اهل الفعل والنماره
اهل العزاوي والسطر والعناني

مشقاص وقناص الرجال الفحولي
عنهم عرفنا الخافيا والبياني

يااحمد ولد متعب كريم الطبوعي
قافي ادزه لك يومن دعاني

يالشاعر اللي لانظمت القصيده
رفعتها بحلا واعلا مكاني

شاعر يوطي القاف يم الطماني
وشاعر رفعها ياسهيل اليماني

براسللك يامن تحب الرسايل
وعليك قافي يالسنافي نخاني

مدري عن السيف المحنا وحناه
قص الحبل والا الحبل بالسواني

ترى الحبل ماكل سيفن يقصه
الا شطيرن ضربته بالثواني

يبي كفوفن تمسكه عن ميوله
وتحركه بقناع ويا أتزاني

جتك القصيده من خيار القصايد
يافاهم المعنى ترى العمر فاني

( رد احمد الفجي
على فواز الدواي )

يامرحبا باللي يقول المعاني
اللي لفاني في جديد المعاني

الشاعر اللي هيضتني قوافيه
ابلغ كلامه بالقصيده لفاني

ألهم هجوسي مايقوله لسانه
يومن شعره بالمعاني عناني

لله درك ماكتبت الركيكه
أبدعت وصفك يافصيح اللساني

أبشر بردن مايجي دون فاقك
وانا القصيد ومجمله ماغواني

ياما بطواريقه سهرت الليالي
أغوص ببحوره واجيب السماني

ولي الفخر في لابتي وانت منهم
صتايمن يروون حد السناني

هم عزوتي بين العرب مسندلي
وانا احمد الله يوم ربي عطاني

انا احمد الله حطهم لي جماعه
الكل منها باللقا غيهباني

أليا اعتلوا بالحرب فوق الاصايل
يبلش بهم من قهوته بالضماني

واضح على كل القبايل ظفرنا
خيالنا ينطح لحاله ثماني

كم شيخ قومن من جواده طرحنا
أيمان ربعي ماتصيد الهداني

عاداتنا ننطح أكثار الجموعي
مابين ربعي لاشرود وجباني

كسابت الذيدان يوم المغازي
وذيداننا تنعم بزود الاماني

ربعي هل الفزعه صليبين الاريا
في مدحهم باب الفعايل دعاني

بني رشيد اهل الصخا والمكارم
اذكارهم فاقت سهيل اليماني

بالجود مايحصى جزايل عطانا
ياما عطينا كل حايج وعاني

مانستضيق اليا لفانا ضيوفي
قدامتن للحيل وسط الصواني

عز الرفاقا والرحابة نبانا
خوينا من طبعنا مايعاني

اقول قولي والبراهين تشهد
يومن غيري بالحكي هيلماني

معروف من بين الاعارب نسبنا
ساسن رفيع يشار له بالبناني

من الجزيره ساسنا نفتخر به
ازكى النجابه من قديم الزماني

حنا سلايل عبس روس الاعارب
بعد الرسول وصحبته بالمكاني

منا افرس الفريس يوم الملاقا
صميدعن سيفه يضيم الجواني

عنتر ولد شداد والكل عارف
اللي كسب نوق الملك بالضماني

هذا جوابي ياسليل الفحولي
وسيوفنا وقت الوغى والطعاني

((جدك)) شهر بالطيب ويا الشجاعه
شبية حرن بالظفر صيرماني

كساب قولات الثنا بالهروجي
يوم المراجل ماتجي بالهواني

خالد عطيب الضرب راع الفعايل
أليا اعتلى من فوق بنت الحصاني

عليه ماضين الفعايل اشهودي
في ساعتن فيها الوغى معدماني

واعرف ترى في لازمك مانسينا
قبلك ترا سلم الحميه نصاني

هذا جوابي يابن دواي جالك
يالشاعر اللي نادر بالزماني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر