شوق الحنين

ضاق صدرى والحزن فاز وتمكن من خفوقي
الفرح اقفى عقب ماذقت من صافي رحيقه

هاضت احروف القوافي والحزن سار بعروقي
انطلق شوق الحنين وهاجسي عيا يعيقه

لوبغيت انسي غرامك كيف بنسى نار شوقي
لوبغيت اسلا محال اسلا عن عيونك دقيقه

زاد حبك بالخفوق اللي على شوفك شفوقي
المشاعر من غيابك في بحر حزني غريقه

رد يمي وابشر بقلبن على قربك سبوقي
الغياب احرق خفوقي كان ودك بالحقيقه

رد لي بسمة شفاتي رد لي كامل حقوقي
اسعد القلب العليل اللي نشف دمه وريقه

قلتها لك من صميم القلب يا وجه البروقي
الامر بيدك تعيد الحب وتنور طريقه

لو كتبت الفين بيت اللى بقلبي لك يفوقي
اعذب ابيات القصيد وكل احاسيسن رقيقه

غيبتك عتمت ظلام ورجعتك مثل الشروقي
بسمتك تروي ضماي وتنهى جروحن عميقه