توصيلة كهرب وذنب عقرب

ياللي بفعل النميمه تمشي وتطرب
عساك تطرب فميفا الجَمْر وتندّي

حيث ان فعلك مثل توصيلة الكهرب
وظيفتك تآخذ الشحنات وتودّي

زودن على ذلك لسانك ذنب عقرب
والعقرب مباينه بالعين تنلدّي

مير البلا مع بعضنا ناكل ونشرب
قدام آعشيك مع خوياي متغدّي

تحب جمع السوالف وفدبل تضرب
وتجمّع الهرج للأصحاب وتعدّي

همك علاقاتنا مع بعضنا تخرب
وتخلي الأخْوِ لاخوانه تقل ندّي

فعل النميمه بطبعك غير مستغرب
عرفت وجهك لونّك عني تصدّي

والله لونّك تجي جنب اذني وتقرب
لاوزي نعالي بحلقك لين ينسدّي

وتصير عبره وبك أسوا مثل يضرب
لجل المشاكل مَبَيْنَ العالم تهدّي

حنا من المسلمين ومن بني يعرب
هذا مهو طبع لاجدك ولاجدّي

مالك عن النار في يوم الجزا مهرب
الا بتوبه نصوح بنية الجدّي

قدام شمس الصبح تشرق من المغرب
ون تبت من بعدها توبتك تنردّي