غلاه فيني شتت العقل تشتيت - ناصر عبيد الرشيدي

هاض الغرام وصهوته واستعديت
واطلقت كل اعنان فكري معاني

للهاجس اللي كل ماحل فزيت
حتى مكاني اتركه لا لفاني

البارحه حددت موعد وتوقيت
الساعه اربع بعد وقت الآذاني

جمعت جيش أشواق قلبي ومريت
للشارع اللي فيه عشقٍ خذاني

ناظرت بيته من بعيدٍ وهليت
دمعٍ على ذكراه سيله غشاني

وقفت قدامه وبالصوت ناديت
يابيت وين اللي بوصله جفاني؟

يابيت لا تسألني شلون أنا جيت
جيتك اشيل من العتب ماكفاني

جيتك لجل ذاك الغلا ماتناسيت
على العهد حتى لو إنه نساني

يابيت تدري إن له بالحشا بيت
بأقصى الضلوع العوج بين المحاني

غلاه فيني شتت العقل تشتيت
لولاه ماجيتك من الشوق عاني

وتصدق إني كثر ما أجيك حسيت
إنك معي بالذات صاير اناني

حس بعنا روحي كثر ماتعنيت
ودي أشوفه صدفةٍ لو ثواني

لولا الحيا والله يابيت دشيت
وسطك وشفت اللي بحبه بلاني

لكن أنا ابقى أنا ماترديت
حتى لو إن الشوق يمه حداني

لإني وفي وعالوفا أنا تربيت
دام الحشا بيته مكانه مكاني

يابيت قله طالبك بس هالبيت
وأقبل سلامي مع عظيم امتناني

يشهد علي الله ماقد تمنيت
إلا أشوفه في عيوني ثواني

© 2024 - موقع الشعر