رحلة شقى مابين غالي وغاليه - ناصر عبيد الرشيدي

بعض الظنون أقرب من الواقع احيان
واحيان ابعد من خيالي وهقاويه

وصمت الرحيل أقسى معاناة الإنسان
مثل العمر لاراح ماعاد يمديه

دام التجارب خير من كل برهان
عرفت وش معنى الزمان وبلاويه

ياما تحملت العنا قدر الإمكان
اضحك وجرحي بين الأضلاع مخفيه

مات الغموض اللي سكن فيني ازمان
وبانت علامات القصيد وقوافيه

بُعد وهموم وضيق نفسٍ وحرمان
وحيره ولوعه وهاجس ذكرى وطواريه

وجروح وطعون وغرابيل واحزان
وصحبة سهر وعناق ليل ومساريه

لوكان لجروح الزمن قدر وإحسان
ماكان سوت فيني اللي تسويه

قصة غرامي مالها غير عنوان
(رحلة شقى مابين غالي وغاليه)

ابطالها عاشق ومغرم وولهان
وختامها جرحٍ شكى هم راعيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر