الرجال

لـ ناصر بن برغش السميري، ، بواسطة سماهر، في غير مُحدد

الرجال - ناصر بن برغش السميري

يامن تشوف الرجال وتعرف أسماهم
بالطيب لاتحسب ان الله مساويهم

تراك ماتعرف اقصاهم من ادناهم
لكن بالتجربه تبدي خوافيهم

فيهم رجالٍ على الطالات ممشاهم
وافين الاشبار عاليةٍ مباديهم

المعرفه نورهم ماتعمس ارياهم
والطيب يرقون به للي يراقيهم

ومع طول منهاجهم ماتقصر إخطاهم
والدّ والصاع توفيبه يمانيهم

ومكملين الحقوق اللي تنصّاهم
ولا يرتخي عزمهم والله مقوّيهم

لكن في وقتنا ياقل شرواهم
وياكثر الانذال والقطعى بطاريهم

عوجٍ خطاهم خبيثاتٍ سجاياهم
على ثرى العزّ ماترسي مبانيهم

ووجيههم ميّته ياشين سيماهم
وقلوبهم سود فيها الحقد معميهم

محطّة إرسالهم ترسل وشاياهم
كذب ونمايم تذيع إبها رواديهم

وأهل الوفاء ثابتٍ بالعزّ مبناهم
ويزيد قوّة عصاهم جمع أياديهم

وألا الدراويش دايم في عميّاهم
يمشون ماعندهم عرفٍ يقدّيهم

دليلهم عن دروب الطيب يحداهم
غادين في غفلةٍ مرخين أذانيهم

مايفقدون الرفيق إن راح وإن جاهم
ولا يعرفون أصدقاههم من معاديهم

تضيع الابصار في تعديل عوجاهم
يبلش بهم عاقلٍ يبغى يوعّيهم

ليا نصحهم تمادوا خطاياهم
وليا بذر له جميله ما أثمرت فيهم

لكن عن قربهم ياطيب فرقاهم
ياجب على الطيّب انه مايواليهم

أقولها والبشر في حكم مولاهم
وإن ماهداهم فأنا مانيب هاديهم

وأعداد حيينهم وأعداد موتاهم
صلوا على اللي بدين الحق منبيهم

© 2024 - موقع الشعر