بلا ستيشن - ناصر بن برغش السميري

يانايف اسمعني ترى العلم ناصيك
انصحك والعدوان ماينصحونك

إبلاستيشن كبّها قبل تعميك
ترى الخطر دايم يهدد عيونك

وان كان ضيّع شوفك اللي يقديك
ترى البشر ياصاح ماينفعونك

واليوم شفناهم تقدّوا بأثاريك
وصاروا على منهاجك يشجّعونك

ليا أمسى المساء تجمّعوا في تحرّيك
ومن حينهم دقّوا على تيلفونك

وتطلّبوك وقالوا الله يخليك
تعال مايصلح لنا اللعب دونك

إجنا يابو خالد عسى الله يعافيك
الرّبع في بيت الشعر يحترونك

ثم جيت ساري ماتميّز مواطيك
ولقيتهم وقّافةٍ يرقبونك

وشافوك ثم قالوا عسى الله يحييك
وعسى هوات اللعب مايفقدونك

لعّيب ماهر محترف من يناحيك
حتى نجوم الغرب مايقدرونك

ومن بعد هذا القول كثرت طواريك
وجلست فالمجلس وبانت جنونك

جلست والتلفاز مابين اياديك
وعن شاشته دوب انهم يمسكونك

ثم جالهم صجّه ولجّه حواليك
مطلوبهم فاللعبه يقابلونك

ومن إبتداي الليل لين أذن الديك
تلاعب الشطّار ويلاعبونك

وفعلك هذا عن ذكر مولاك يلهيك
وفيه الرجال اهل القدا ينقدونك

لكن تب واطلب عسى الله يهديك
وعن هرجة النقّاد جوّد حصونك

© 2024 - موقع الشعر