ابدي بذكر المعتلي خير ماقيل
اخير مبدأ ذكر علاّم الاسرار
ومن بعدها سار القلم بالتماثيل
وسطّر على الاوراق جزلات الامثال
امثال تقصر عن سموع الجهاهيل
وياعاقل اسمع بادي العقل وش قال
واعطيك من علم الصناديق تفصيل
واحد بليا قفل واثنين بأقفال
واحد مقفّل والمخابر مثاقيل
مخابره تبدي ثمينات وثقال
وواحد مقفل والمخابر مهازيل
تلقاه لأنواع الهزيلات شيّال
وواحد بليا قفل مابه محاصيل
وغير الهوى مابه ولا ربع مثقال
وياسامعي من لا يجرب فلاسيل
ومن لايميّز ماعرف دق وجلال
والنور يكشف ماغطى دلقس الليل
ويوزن على الميزان ماكان مكيال
والناس مختلفين فالوزن والكيل
رب السما خالقهم الوان واشكال
الله خلق منهم رجالٍ مشاكيل
يستاهلون النعم ذربين الافعال
درب الوفاء منهاجهم ماعنه ميل
ودايم مباديهم عسيرات وطوال
تصعب على اهل الحط والنقل والشيل
اللي على النمّه شفيقين وعجال
وقلوبهم لأهل الشكاله مغاليل
ودرب الردى لأقدامهم فيه مدهال
ياعاقل احذر فالليال المقابيل
واخذ الحذر والبعد عن قرب الانذال
ابعد وقل يالله عليك التساهيل
من جاور النمله فلا ارتاح له بال
ولا تنخدع في كبر بعض الازاويل
يامصغر المضمون ياكبر الازوال
بانوا بظافية الملابس رياجيل
وليا بحثهم صاحي الفكر يهتال
يجون باصحاب الفكر والدهاويل
وسط المجالس عندهم هذر وجدال
يفضلون الحكي والنوم تفضيل
ويجانبون الطيب في كل الاحوال
والبوم يلقاء له شبيه ومداهيل
ياقع على العوشز وللرجم ماطال
والحر يبدي في طوال الاقاذيل
يشهر ولا يرضى مع البوم منزال
وصلاة ربي عد وبل الهماليل
على شفيع الخلق في يوم الاهوال

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
الوقت المطلوب للقراءة
دقيقتين و 54 ثانية
© 2019 - موقع الشعر - بواسطة شركة المبرمجين