الحاسد

يالحاسد الحاقد وش اللي يخليك
تحسد عباد الله فيما عطاهم

للخلق سيّات الاماني تمنّيك
تفرح بصادوفٍ يكثّر عناهم

الفاسق الملعون وصفه يحاليك
اللي يظلل للبشر ويحداهم

حط الحبال المبهمه بين اذانيك
ومشّاك ضمن الشله اللي لقاهم

وقام أيتحكّم بك ويامر وينهيك
وحمّلك عن بعض الاوادم خطاهم

ومن زود حقده للخلائق يعبيك
حقدٍ لوافين العرب وشرفاهم

حلو بمنطوقك وشرك بخافيك
واهل الوفاء والطيب تكره لقاهم

تكره رجال الطيب من حر مافيك
يابارد الذرعان جعلك فداهم

وفي غيبة الغيّاب تكثر لغاويك
تقفى رياجيلٍ بعيدٍ مداهم

غيابهم على كلامك يجرّيك
وتطلق لسانك بالخطا من وراهم

وألاّ ليا حظروا تظلي كما الديك
وقطع وتخسى ماتجي في نحاهم

مع طول خطوتهم قصارٍ خطاويك
ولا مستواك بواصلٍ مستواهم

ومع طيب ممشاهم خباثٍ مماشيك
خبيث ممشا ماتجي في سراهم

بالزور والتظليل دايم مساعيك
ودّك تصد اهل القدا عن قداهم

ومسعاك بين الناس نمّه وتشكيك
ودّك تسبب شقرةٍ في عصاهم

هذي علاماتك وهذي مواريك
واهل الردا دايم يبيّن رداهم

مالك من العالم خويٍ يخاويك
إلاّ ضعوفٍ ضيّع الله جداهم

اللي خطاهم في طريقك تباريك
يمشون معك ومشيهم في عماهم

الخايبين الناقصين الصعاليك
شلّة مساكينٍ قليلٍ حلاهم

اهل الوجيه السود عوج المساليك
في غيبة الغايب كثيرٍ لغاهم

يالله يارب السماوات نرجيك
انّك تقلل شكلهم وتهداهم

ونطلبك يارب البشر من حسانيك
ياخالقٍ خلقه وعالم خفاهم

يالله من جودك ومن مد أياديك
تسقي ديارٍ حل فيها بلاهم

تسقي ثرى دارٍ شجرها مهاليك
وناسٍ على فظلك وجودك رجاهم

بالصدق والدعوه عبادك تناجيك
ياخالق الاكوان تقبل دعاهم