قلبي عليك - اماني السمان

قلبي عليك من الوله ذايبٍ شوق
مشتاق شوق ما تحده مساحه

يسري بدمي شوق يجري بالعروق
يدمي ويسقي من جراحه جراحه

ليلي يناظر بالفضا نور وشروق
وليلك يسهرني اناظر صباحه

أصبح ونفسي ياهوى تحن واتوق
وامسي بفكرٍ في غموضه صراحه

أسبق زماني واشقي العوق بالعوق
والقى زماني راح ماراح راحه

يا من ملكت الشوق يا مكمّل الذوق
يا من عرفت الحب غدوه مراحه

كلمه حبيبي خلك بقلبي شفوق
كلمه تزود هالبسيطه ملاحه

كلمه تخلي الكون في حربه يروق
كلمة تشيل الهم تبعد نواحه

هذا خفوقي عن ثرى الذل مرموق
ما باح عن حبه ولا لاح لاحه

لكن تشوف الحب في العين منطوق
نظرة غلا المشتاق فيها سماحه

ولما يذوب الشوق والقلب محروق
تلقى حنايا الروح أوسع براحه

© 2022 - موقع الشعر