وصَيتْ قلبي عليك

وصَيتْ قلبي عليك وفكري وظنِّي
ان غبت عنهم عليك عتابهم هادي

ما ودٌي تجرح شعورك كلمةٍ منِي
وانته حياتي وعمري ومهجةْ فوادي

ودي تعيش العمر راضي ومتهنِّي
مرفوع راسك عليك العز متبادي

يا تاج راسي وانته منِّي وعنِّي
تأمر وتنهي وامرك أول البادي

من كثر حبِّي عليك الخوف يمحنّي
وافقد شعوري واشوفك غاية مرادي

ان غاب صوتك أناجي الليل واونِّي
واتخيِّلك واتذكّر هامةْ بلادي

مديون لك بالغلا والحب متجنِّي
يا مستحل الفواد العاشق الغادي

من يشبهك في البشر يا ذوقي وفنِّي
يا راحتي وبسمتي وموتي وميلادي

وصّيتْ قلبي عليك وقال مبلنِّي
واحذر غيابك على قلبي مَهٌبْ عادي