سنبلة .. سنبلة

هات يا وقت بعضك لو يمينك بخيل
اجمع آخر زماني ب اوسطه ب اوله

شف معي كم بقالي و لا تقدم دليل
اكذب و قول باقي في مداك ...اطوله

سبع يا لسبع جاتك قبل يوم الرحيل
ليه ؟ مدري و لكن شوفها مقبله

سبعة أعوام عدت ..يا رداة الحصيل
لا عرفنا و لا احنا .. حظنا .. نجهله

لكن الوهم نبّش في رفات القتيل
باخر العام و احيا سالف المهزله

(عام) ثاني ... و لكن ما يسوي جميل
عاشقك ( يوم ) ثاني بالجفا ... يقتله

سبع مرَّت و كانت تشبه المستحيل
شهدها ثوب عاري يستر الحنظله

سبع مرت خفيفه في زمان(ن) ثقيل
كان قلبك بيصدق في الجواب اسأله :

كم نثرتك رماد(ن) من زرعتك فتيل؟!
و كم بحلمي حصدتك سنبله .. سنبله؟!

سالت الشمس حرقة قبل دمعي يسيل
فوق وجه الليالي و انهت ... المسأله

و احتضار احتفالي في الزمان العليل
عكر الجو كله يوم عشت ... اجمله

كل هذا و لا ادري هو بقالي قليل
أو بقى من عذابك لي سنه مقبله ؟؟!!

كلمات / وصايف تهامية
الأحد / 2/6/1431ه