مطر روحي

مطر ... و الجدب يسكني بدونك و المطر سلواي
فلحظات الغياب اللي سرت به قسوة ازماني

غيابك لو ثواني قصار يكرِّه خاطري بدنياي
ثوانيك بسنيني اللي مضت ...و الباقي الفاني

أحاول بالصبر ألقى ثبات و غيبتك باقصاي
تزلزلني .... و ينذرني ظماي بموتي الداني

حبيبي لا نشف غصني و جفَّت دنيتي ش الراي؟
أموت من الظما ؟ و الاَّ ... تحن و تروي اغصاني؟

بعَض مافيك يقتلني ظما و القى ف بعضَك ماي
و أرد احيا بك و أحياك مثل ما ( إنت ) تحياني

حبيبي ودَّع الخافق بقايا الصبر و اللي جاي
جفيته قبل لا تعصف به اشواقي و يجفاني

دخيلة هالدفا ولى شتا العالم و طال شتاي
ابشعلك ف هشيم الروح دفا يسري بوجداني

تعال و خلني القى بك اهلي موطني مأواي
تعال و خلني انفي الظما و الضيم و احزاني

على ( عين الذي لذَّت عيونه )ف غيبتك ببكاي
تعال و دثّر احساسي ب غيض احساس عاداني

تعال و خلها تمطر بشاير غايتي و مناي
و يرجعلي هنا عمري عقب ماهو تعداني

حبيبي كنت اهدد بك ليالي ما مشتها خطاي
و شفتك في الصباح اللي شعورك فيه مشاني

على كثر اللي قد مروا بحياتي أو بقوا وياي
أحس القلب من قبلك قضى هالعمر ( وحداني )

(مطر) ايش الذي أرجي بعدما جيت في دنياي؟!
قسم انك مطر هالروح و لا احتاج المطر ثاني