دستور ياكذبة تصاريح وبشوت

يا هاجسي سرّ اصْدَق الْشِعْر سرّه
والليل صدرٍ من غثا الوقت مكبوت

واللي يِحِزّ ويجْرَحْ النفس مرّه
هي وقفة الطيب على باب سربوت

الفقر حبلٍ كَتِفِهْ ثم جرّه
حتى تسوّل با لعطا مدّ هلفوت

بَدْخُلْ كِذَا :وِ لاّ السوالف مِجِرّه
مَا هِي وفاة عقاب وَتْرِمِلَتْ نوت

يوجد بحر :واستنزف الغير درّه
يَا كَمْ خذوا مِنّه زمرّد وياقوت

وهو مَابَخَلْ بَالْمَدّ مثقال ذرّه
تشهد عماير مصر وابراج بيروت

وفي سَاحْلَه ناسِ هم أوْلَى ببرّه
لكن يد النسيان ترمي بهم أوت

واللي يقول أوضاعهم مستقرّه
هذاك يهدي شوك مَايِهْدِي التوت

ملّت حناجرنا كثير التشرّه
دستور يا كذبة تصاريح وبشوت

وِسْعْ الْفَضَا بَحْرَه،وِجَوّه ،وِبَرّه
كم ضاق بعيونٍ تصارع على القوت

والفقر سيره حربها مستمرّه
غير البسوس ومعركة عين جالوت

الفقر ذِلّ وعيشة الفقر مُرّه
كم شَتّتْ ارواحٍ وكم هدّم بيوت

وكم ذَلّ حُرّ: وكم كِسَرْ نفس حُرّه
وكم جثةٍ مَا ضَمّهَا صدر تابوت

الفقر صيفٍ يشوي الجلدّ حرّه
من شِدِتَهْ شِفْ قاسي العظم مفتوت

يبِيِنْ ووجيه الفقارى مَقَرّه
كأنها صَخْرٍ بِهْ البؤس منحوت

الفقر مَهْمَا حاولوا كَتِمْ سِرّه
السرّ شاع وصامل العلم مثبوت

الخير قَلّ ووقتنا زاد شرّه
حتى اضْحَت ْالدنيا بَحَرْ والزمن حوت

ياموت تاخذنا على حين غرّه
وكفّك تشوت ارواحنا للفنا شوت